Öskupokasaumur
Eins og flestum er kunnugt hefur verkefnið barnaföt fyrir barnaheimili í Tógó, sem krakkarnir í 7. og 8. bekk í Való hafa verið að vinna í saumum í samstarfi við Sóley og félaga, gengið frábærlega vel og nú höfum við hafið frekara samstarf.
Sóley og félagar hafa ráðist í átak til að hleypa nýju lífi í þann sið að hengja skrautlega öskupoka aftan á fólk á öskudaginn. Öskupokar verða saumaðir víða um land af fólki á öllum aldri og boðnir til sölu á vel völdum stöðum. Allir gefa vinnu sína og andvirði pokanna rennur í byggingasjóð fyrir munaðarleysingjaheimili Sóleyjar og félaga í borginni Aného í Tógó í Afríku.
Krakkarnir í í 7. og 8. bekk í Való hafa undanfarnar 2 vikur tekið þátt í þessu átaki og saumað á milli 300-400 öskupoka, merkta Sóley og félögum. Einnig hafa nemendur í lotu í saumum í 5. og 6. bekk í Mýró tekið þátt í verkefninu. Nokkrir nemendur í 7. og 8. bekk hafa skipað nefnd og ætla sjálfir og sjá um sölu öskupokana á Nesinu, helgina 5. og 6. mars.