Fréttabréf Mýrarhúsaskóla, apríl 2004

FRÉTTABRÉF MÝRARHÚSASKÓLA -  APRÍL 2004
Ritstjóri: Árni Árnason—Ábyrgðarm.: Regína Höskuldsdóttir  Sími:
5959200— Netfang: myrarhus@seltjarnarnes.is 

Heimasíða: www.myrarhusaskoli.is

Arthúr Ólafsson 1940-2004 

Í janúar sl. lést Arthúr Ólafsson fyrrum mynd­mennta­kennari hér við
skólann. Hann varð kennari við Mýrarhúsa­skóla árið 1961, strax og hann
lauk kennaranámi. Hér starfaði hann í nokkur ár og gat sér fljótt gott
orð meðal kennara, nemenda og for­eldra. Arthúr hafði brennandi áhuga á
starfi sínu og átti auðvelt með að hrífa nemendur með sér. Hann notaði
frekar óhefð­bundnar aðferðir við kennslu sína en það sem einkenndi
kennslu hans öðru frem­ur var hversu mjög honum var í mun að nemendur
fengju notið sköpunar­gleði sinnar í námi. Þetta átti ekki aðeins við í
myndmennt heldur gat það átt við í öllum náms­greinum. Þessu kynnt­ist
ég mjög vel þar sem hann var ýmist umsjónar­kennari minn eða
myndmennta­kennari þegar ég var nemandi í Mýrar­húsaskóla á aldrinum tíu
til þrettán ára.

Arthúr var mjög trúaður á gildi listarinnar í menn­­ingu þjóða jafnt sem
í lífi og starfi hverrar mann­eskju. Hann þreyttist aldrei á því að
miðla sjónar­miðum sínum í þeim efnum og átti mjög auð­velt með að
tengja þau ýmsum náms­grein­um. Hann kynnti okkur börnunum helstu málara
lista­sögunnar og sýndi okkur mörg þekkt verk úr heimslistinni og hvað
nemendum viðvék átti hann létt með að sann­færa þá um hæfileika þeirra
og sköpunarkraft. Hann innleiddi hér í skólann hvers kyns liti,
blý­anta, krítar, pensla og verkfæri til myndvinnslu í hin ólíkustu
efni. Hann stóð fyrir því að á laugar­dögum voru í skólanum sérstakir
tímar handa þeim sem vildu mála og teikna. Áhugasamir nemendur fengu svo
að skreyta veggi skólans undir hans hand­leiðslu og má líta sum þessara
verka á veggj­um skólans enn í dag. Í þess­um verkum voru það hugmyndir
nemenda sjálfra sem réðu ferðinni í en Arthúr kom meira að sem
ráðgefandi um tækni og útfærslu. Veggmyndirnar sem nemendur gerðu í
skólanum í hans tíð spurðust víða og enn þann dag í dag er nafn Arthúrs
vel þekkt í hópi íslenskra myndlistarkennara þótt margir áratugir séu
frá því hann yfirgaf þennan vettvang. 

Mér er það sérstaklega minnisstætt hversu jákvæður og prúður hann var
sem kennari. Hann bar virðingu fyrir nemendum sínum og kenndi með þeirri
ró, glaðværð og festu sem þarf til þess að skapa góðan bekkjaranda, og
tiltrú nemenda á viðfangs­­efnum sínum. Fyrir mér var Arthúr einstakur
kennari og góð fyrirmynd öðrum kennurum. Sem kennari ber ég djúpa
virðingu fyrir því starfi sem hann vann hér við skólann og er honum
þakklátur fyrir það vegar­nesti sem hann gaf mér ungum. Megi minningin
um hann lifa björt meðal þeirra sem áttu því láni að fagna að njóta
samveru með honum.

Árni Árnason 

Þemadagar

Nýafstaðnir þemadagar fóru vel fram og urðu nem­endum til tilbreytingar
og gleði. Nemendur fóru vítt og breitt um vegi vatnsins, fjölluðu um
vatnið í margvíslegum verkefnum í skólanum, vettvangs­ferðum og leikjum
í sundlauginni. Veggir skólans eru prýddir fjölmörgum fallegum
myndverkum sem nemendur sköpuðu á þessum dögum og hvetj­um við foreldra
til að ganga um skólann og kynna sér þau verk sem börnin hafa gert í
tengslum við vatnið á þessum dögum. Önnur verk sem unnin voru, s.s.
dagbækur og rituð verkefni ýmis konar eru ekki eins sýnileg að ekki sé
minnst á ljóðin sem nemendur gerðu. Hér á eftir koma ljóð sem nemendur í
fjórða bekk gerðu. 

 

Vatn, það besta í heimi er

Allavega finnst það mér.

Tjarnarvatn, vatn í sjó

Neytum vatns, ég hef af því nóg.


Stefanía Bergljót Stefánsdóttir 4 – C


 

Vatnsberi, vatnsberi vatnið ber,

Aftur og aftur í húsin fer.

Tunnan geymir vatnið kalt

Núna drekk ég það allt.


Stefanía Hanna Pálsdóttir  4 – C


            

 

Vatnið er kalt og gott

Alltaf er það hollt

Tært vatn drekk ég, já

Nú vilja allir það fá.

Gunnar Birgisson  4 – C

 

 

“Klimmið”

Eins og áður hefur komið fram er Mýrarhúsaskóli þátttakandi í
Evrópusamstarfsverkefni sem styrkt er af Comeniusaráætlun
Evrópusambandsins. Verk­efnið felst m.a. í því að stuðla að því að
innleiða kennslu­aðferð (CLIM) sem hentar í fjölmenningar­legu
samfélagi. Yfirmarkmið kennsluaðferðarinnar er að nemendur verði
fjölmenningarlega hæfir, þ.e. að þeir læri að meta fjölbreytileikann
almennt í samfélaginu og að félagsþroski þeirra sé örvaður í gegnum
samvirkt nám. Kennarar í 4., 5. og 6. bekkj­um hafa undanfarið verið að
vinna með fyrstu kennslu­eininguna sem heitir “Eigum við að skemmta
okkur saman?” og gengur út á að nem­endur undirbúa bekkjarskemmtun sem
er undirbúin í viðkomandi bekk undir formerkjum kennslu­aðferðarinnar.
Til fróðleiks viljum við birta hér ummæli nokkurra nemenda í 4. bekk sem
hafa glímt við verkefnið:

 

Það var rosalega gaman að undirbúa þetta bekkjarkvöld því við fengum að
gera allt sjálf,  allir höfðu sitt hlutverk og allir tóku þátt í
undirbúningnum. Bekkjarkvöldið okkar tókst frábærlega.

 

Við unnum þetta verkefni á 7 vikum. Markmiðið var að undirbúa
bekkjakvöld alveg ein og heppnaðist það mjög vel. 

 

Við lærðum mjög mikið á þessu og okkur fannst mjög gaman. Kennarinn
skipti okkur í hópa og fengum við öll okkar hlutverk. Í hóp­unum gerðum
við grímur, kort, matseðil og dans. Síðan sýndum við foreldrum okkar
allt.

 

Þegar við vorum í hópavinnunni gerðum við skreytingar, matseðil, grímur,
dans og dagskrá. Af þessu lærðum við að vinna saman í hóp.  Allir geta
eitthvað, enginn getur allt.

 

Sinfóníutónleikar

Miðvikudaginn 31. mars fóru 5. og 6. bekkingar á tónleika
Sinfóníuhljómsveitar Íslands í Háksólabíói undir stjórn Gunnsteins
Ólafssonar. Á dagskrá voru hljómsveitarverk frá ýmsum tímabilum
tónlistar­sögunnar sem öll áttu það sameiginlegt að fjalla um drauga og
kynjaverur. Danshópurinn Eldmóður kom fram og dansaði nornadans.
Sögumaður var Jón Jósep Snæbjörnsson eða Jónsi, söngvari
hljóm­sveitarinnar Í svörtum fötum. Hann söng og lagið Garún við
undirleik hljómsveitar­innar. Var ekki annað á börnunum að heyra en að
þeim hefði þótt þetta hin skemmtilegasta stund.

 

Spilafaraldur

Undanfarna daga hefur mjög borið á því að nem­endur væru með Yugiuh eða
Pokemon spil í skól­an­um. Hafa margir verið uppteknir af því að skipta
á þessum spilum eða metast um þau sín í milli inn­an skólans sem í
frímínútum. Iðulega hafa komið upp einhvers konar leiðindi vegna þessara
spila og höfum við þar haft mestar áhyggjur af yngstu nemendunum. Á
kennarafundi fyrr í vikunni var því ákveðið að banna áðurnefnd spil í
skól­anum.

 

Úr skáklífinu

Þann 28. mars sl. fór fram Íslandsmót grunn­skóla­sveita í skák í
stúlknaflokki. Sigurvegari í ár var A-sveit Rimaskóla en í öðru sæti
lenti nýstofnað lið frá Mýrarhúsaskóla og hlaut þar með
silfurverð­laun­in. Bronsverðlaunin hlaut B-sveit Rimaskóla. Óskum við
stúlkunum okkar innilega til hamingju.

     Okkur hefur borist áskorun frá piltum úr 5. og 6. bekk sem eru í
Hróknum. Þeir hafa mikinn áhuga á að við skólann verði til skáksveit.
Þeir eru ekki nema þrír en þurfa þrjá í viðbót til að geta myndað
sveitina auk varamanna sem nauðsynlegt er að hafa ef forföll verða á
mótsdegi. Áhugasamir þurfa að hafa tekið þátt í móti og kunna að nota
skákklukku. Þeir sem eru til í slaginn sendi tölvu­póst til Jökuls í
6.-B (jokulljo@torg.is). Mótið verður í lok apríl.

 

Páskafrí

Páskafrí hefst í vikulokin. Kennsla hefst svo aftur skv. stundaskrá
þriðjud. 13. apríl. Starfsfólk Mýrar­húsaskóla óskar nemendum og
foreldrum gleði­legra páska, vonum við að allir eigi ánægjulegt
páskaleyfi framundan.