Alþjóðadagur læsis 8. september

Alþjóðadagur læsis er 8. september ár hvert, af því tilefni var yngri bekkjum Mýrarhúsaskóla boðið á bókasafnið í sögustund. Nemendur í  5. og 6. bekkjum tóku á móti 1. 2. og 3. bekk og lásu fyrir þau skemmtilegar sögur. Yngri börnin hlustuðu af athygli á þau eldri sem stóðu sig alveg sérstaklega vel. Eftir sögustundina fengu nemendur að skoða bækur í rólegheitum á safninu. Þetta var mjög skemmtileg og vel heppnuð stund.

 

 

Alþjóðadagur læsis 8. september

Lesum hvert fyrir annað

 

Á degi læsis er fólk hvar sem er á landinu hvatt til að lesa upp fyrir hvert annað, segja sögur, fara með ljóð eða á annan hátt nota málið til ánægjulegra samskipta.

Árið 1965 tileinkuðu Sameinuðu þjóðirnar ár hvert 8. september mikilvægi læsi fyrir lífsgæði og baráttunni gegn ólæsi. Í heiminum eru ennþá 20% fullorðinna ólæsir vegna skorts á tækifærum. Þar af er hlutfall ólæsra kvenna 66%. 75 milljónir barna eiga ekki kost á skólagöngu.

 

Íslendingar hafa getað boðið börnum sínum tækifæri til lestrarnáms en læsi er nú skilgreint af SÞ sem grunnlífsleikni. Til að viðhalda lestrarfærni þarf að iðka lestur. 

Að frumkvæði Háskólans á Akureyri og Amtsbókasafnsins á Akureyri var ákveðið að taka nú í fyrsta sinn þátt í alþjóðadegi læsis til að leggja áherslu á mikilvægi læsis til gagns og gamans og þann auð sem þjóðin á í vel menntuðu fólki.

Í tilefni af deginum munu Austurglugginn, Morgunblaðið og Víkurfréttir birta framhaldssögu fyrir börn um Jónsa fréttaritara í átta hlutum.  Kaflarnir birtast einu sinni í viku.  Sagan er gefin af alþjóðasamtökum blaðaútgefenda (WAN).

Á Akureyri verður, þann 8. september, boðið upp á fjölbreytta og létta dagskrá á ýmsum stöðum bæjarins. Allir sem  hafa umsjón með viðburðunum gefa vinnu sína.

Þess er vænst að aðrir staðar á landinu taki upp merkið, lesi saman á vinnustöðum, skólum og  heimilum og setji upp dagskrá í sinni heimabyggð.